隔牆有耳：校友反對大樓做行政
報道連結
扎根喺本部大樓已經一百年嘅文學院要搬，師生同舊生就最唔 like。喺文學院執教鞭26年嘅詩人梁秉鈞教授（也斯）話，本部大樓嘅氣氛畀咗唔少靈感佢，「辦公室唔止係一間房有部電腦」，除咗空間大，有松鼠，得閒仲可「裝」吓人哋影結婚相㖭。
廿幾年前喺文學院相識嘅邱生邱太，由同學仔變做夫妻，今日兩個女都已經8歲同14歲，噚日一家四口返到學院都幾感觸。喺浸大教書嘅邱生話，用本部大樓做行政，又可惜又浪費，「我係堅決反對！應該留番俾師生做教學或者搞活動！」
一年級生葉君懿都覺得好可惜，「入港大前已經好想喺呢度上堂，估唔到讀咗一年就要搬，最好可以開番啲課室俾學生上堂」。佢仲好有詩意咁為本部大樓影咗輯沙龍，話要當情書送畀大樓。
沒有留言:
張貼留言