2012年4月24日蘋果：隔牆有耳：歡送文學院 大談界仔經

報道連結

銅鑼一響，歡送儀式完結，港大文學院將陸續撤出本部大樓，搬去新嘅百周年校園喇。充滿藝術氣息嘅本部大樓，孕育出唔少知名藝術家，一班舊生噚日喺陸佑堂舉行歡送儀式，個個都好依依不捨！
兩大導演懷念那些年

62年畢業、讀英文同英國文學嘅校友陳方安生，就喺陸佑堂，有佢最開心嘅回憶。除咗經歷無數考試，最重要係喺 annual ball識到現任老公，又同媽媽一齊上台獲頒榮譽博士。
導 演張婉婷及羅啟銳就話好唔想大樓改做行政用途，兩夫婦緬懷番那些年，一個浪漫一個爛玩。張婉婷當年鍾意着住超短裙參加 Barn Dance舞會，好有識男仔心得，教路指：「醜男鍾意行先，要好小心唔好望佢哋，以免俾佢哋請到。」



羅啟銳就話鍾意爬上鐘樓附近啲欄杆，同書友雙腳吊吊 fing傾偈搵靈感，佢仲透露將以自己做題材。話說畢業嗰年佢忽發奇想，將用剩嘅洗衣粉倒入陸佑堂出面個噴水池口，諗住幫手洗吓地喎，「一噴就充滿白泡， 好靚㗎！」呢條橋幾時出現喺銀幕仲未知，但遲啲陸佑堂會搞返次 Barn Dance，兩位大導可以重演那些年啦，點知張婉婷就笑話應該係「老殘遊記」！

校長徐立之噚日除咗幫手敲鑼鼓，又拎住搖鼓帶頭圍住大樓巡遊一圈作歡送，不過睇得出校長冇咩離愁別緒，因為佢唔係同本部大樓 say bye，而係 say hi，事關校長室可能之後就會遷入喇。